Enpresa 1995eko abenduaren 21ean sortu zen, horretarako deitutako lehiaketa publikoa eta ondoriozko esleipena zela bide; harrezkero, transbordadore zerbitzua etenik gabe ustiatu da itsasadarraren bi ertzen artean, eta horixe da, hain justu ere, sozietatearen diru-sarreren iturri nagusia gaur egun.
Azken urteetan, sozietateak bete-betean asmatu du berritzen, alderdi turistikoak indartuz eta jarduerak dibertsifikatuz (bisitak, merchandisinga, etab.), betiere, garraio ustiapenaren arreta eta hobekuntza alboratu gabe; hala, batetik, ingeniaritza obra bitxi gisa zubiak berak duen erakargarritasuna eta, bestetik, UNESCOk 2006. urtean hala izendatuta, Mundu Mailako Ondare izatea baliatu da.
Gaur egungo sozietateak, 1995. urtean emakida bere gain hartu zuenean, jakin bazekien ezinbestekoa zela zenbait inbertsio garrantzitsu egitea berrikuntza eta eguneratze lanei ekiteko, bai egituraren zenbait alderditan (ontzitxoa aldatzea), bai zubiaren funtzionatzeko sisteman (irekiera eta itxiera, atrakalekua, abiadura, klimatizazioa, sarbideen kontrola), baita zubiaren funtzionaltasunari zegokionez ere. Hortaz, transbordadore baten berezko eginbeharra betetzeari utzi gabe, alde komertzialetik (oinezkoen pasarela irekitzea) ustia daitekeen elementu turistiko gisa ere balia daiteke.
